Un Poema

Préstame entamar los mios artículos, o lo que caún piense que son, con esti poema que me tresporta bien p' atrás.

...pero falen.
De la qu' abrió los güeyos
naide yera p' atalantar, plasmaos,
si espresaben no más fondo
l' ablayu énte lo descubierto,
la gayola énte la vida
o la esmolición énte 'l futuru.
La mio fía acababa nacer.
L' " inda nun pue ver" del enteráu de turnu
dexóme ablucáu y duldosu de la so intelixencia.
Inda más cuando los güeyos del llucerín,
verdiazulaos y esllumantes,
que clisaben el baltu del mio coral,
taben nesi intre falando:
-"¡Hola, pá. Hola, ma!"
Llueu, sí, durmióse,
satisfecha,
asosegada,
paciblemente.
Y una llárima de plata
esbarió pela mio mexella,
escurriéndose adulces
hasta aballar selemente,
posándose, tienra,
enriba la so cabeza.
Y siguió durmiendo,
sorriente.