Hai yá más de mes y mediu que nun artículu
d’esti blog, ¡Ai, ai, ai!, del once de mayu, escribía yo que la quinta fola de
la covid taba formándose y acabaría por averase tanto a nós que diba esfronar por mor de della xente
que namás piensa nella mesma.
Bono, pues yá ta aquí. Nun afecta tanto a
hospitales, pero los Centros de Salú de Primaria yá tán a tope.
A min siempres me fizo un nun sé qué
cuando había políticos que teníen como oxetivu caberu la fin de la epidemia y
pa ello pidíen responsablidá a los xóvenes. Nun sé, paecióme y paezme que yera de
soplagaites los que encamentaban que con dicilo diben ser escuchaos. Polo menos,
a la vista de lo asocedio en tiempos pasaos.
La mocedá, la xuventú hasta una edá yá más
que respetable, namás piensa nella mesma. Gúste-ys o non a los de más o menos edá, qu’a min me la
refanfinfla.
Cuando facían protestes y manifestaciones
escontra dellos apartaos de les lleis d’ Educación que s’ aprobaron nesti país
d’ acuantayá p’ acó, yeren, dicíen dellos muérganos de comunicación, una muesa de
la responsabilidá d’ estos chavales darréu que lluchaben polos sos drechos. Sicasí,
enxamás los vi pa protestar porque-ys dexaran pasar de cursu con dos o tres
asignatures pendientes, como si talo fuera un llogru de la hostia: ¿qué
pensaría’l que s’ esforciaba a más nun poder
abrasando coldos y perdiendo hores de folgueta, pa ser quien a aprobar y
algamar unos oxetivos necesarios pa siguir alantre? Ahí nun hai manifestaciones
que se sepa. Ni los medios de comunicación dixeron un res d’ ello, namás que pa
defender unes midíes fates.
Si salién a la cai pa defender un mou de
vida afayaizu col envís d’ algamar un mundu meyor protexendo’l mediu ambiente
nel que vivimos, son una mocedá responsable y comprometida cola sociedá y que
nagüen por un futuru meyor pal ser humanu. Los mesmos responsables de dexar parques, cais,
playes, etc, atarraquitaos de mierda de toa clase cuando-ys da por faer fiestes, xuntances, quedaes o botellón, que ye cada dos por tres.
Cuando cuatro xóvenes apaecen nuna
manifestación de pensionistes pa pidir una pensión xusta pa los sos mayores, a
saber si ye por ello y hai dellos qu' asina lo camienten o porque cuantos más cuartos tengan los mayores más-ys
toca a ellos. Porque lo que ye un gran númberu d' ellos nes manifestaciones nun paecía que los hubiera..
Pero son una mocedá responsable, dicen dalgunos.
Pa min qu’esto de la responsabilidá y la solidaridá, mentanto
nun se-ys esplique lo que signifique, una gran parte de la mocedá nun tien nin puta idea de lo qué
ye. Y lo peor, tampoco-ys importa. Son egoistes, solo piensan nellos mesmos: na
so educación, cuanto más cenciellos los conteníos meyor, qu’ eso de tener qu’
estudiar y dar güelpe nun va con ellos. Entós, hay que facer güelga pa estudiar
lo menos posible. Ansí, d’ hai cuarenta años p’ acá. Y los resultaos vémoslos, por poner un exemplu, nos más de los políticos que tenemos anguaño, ensin dir más lloñe.
Piensen nel so planeta, que-yos lu dexemos
mui axeitáu, qu’ ellos yá s’ encargarán de baltialu, pero más alantre.
Mentanto, son los más defensores de midíes que nun entienden y que nun se creen
nin el qu’asó la manteiga. Escaecen daqué perimportante pa llograr lo que
quieren: el mundiu ye güei una globalidá onde, por más que se pueda faer n’España, quien más contamina nun ye esti país que poco más pue faer q’oyir, ver
y callar nel panorama internacional. Y nos países más contaminantes la xuventú nun se mueve o nun se-y dexa movese.
Y los vieyos, como yo, claro que tendríamos
que cobrar más, pa que los nietos y los
fíos nos lo fundan, que tampoco ye nada anormal nestos tiempos que cuerren. Por eso piden más pensiones, pa beneficiase, pescanciarán una bona panda d'ellos.
Agora, güei, cuando vemos que l’índiz de
contaxos miedra porque la mocedá ye la causante d’ello, nun se nos ocurre otra
que dicir que lo meyor ye vacunalos. Val, pero hai que dicilo too: vacunalos porque hai munchos que son unos irresponsables del copón. Y que naide me venga con pañinos calientes
nin escuses hipócrites o interesaes queriendo enguedeyanos con bones pallabres,
porque nun van tener razón. Y munchos pas y mas d’ eses xoyes de chavales, que
tán esparciendo la covid, tán como los fíos o peores. Porque fueron ellos quienes
los educaron y habíen siguir educándolos. Enseñalos, na escuela; edúcalos,
ellos.
Pero bono, ¿nun son responsables pa votar dende los dieciocho?
Pues que lo seyan pa guardar midíes d’esti tipu, igual que cualisquier ciudadanu. Pal casu de los contaxos nun hai edá, conque toos lo mesmo. Drechos y deberes, pa toos.
Y pensar qu’hai dellos políticos
que quieren que voten los de dieciséis, viendo lo que fain los de dieciocho n’adelantre. ¡ Y, peor, aínda
tienen quienes los defienden!. Que Dios nos garre confesaos, con estos, esos y aquellos.