viernes, 22 de abril de 2011

Tornar al orixen.

Ente los ruíos estrueldosos de motores de coches,
ente’ l fumu fediondu de les chiminees y tubos d’ escape,
ente ‘l billuriciu d’ una cai atacada xente,

acelerada, nerviosa y a la gueta rebaxes,
los mios oyíos y la mio ñariz, talo vírxenes vestales,
avezaos al silenciu pudorosu del mio llugar,
al doce revolotiar de palombes, zocones y malvises,
al arume de montes de carbayos, castañales y piornos,
al arrecendor del romeru, la marialuisa

y la yerba segao,
al rítmicu correr ensin priesa del regatu,

que m’ adormez amorosiegu,
sollíviense engafentaos encamentándome afuxir

del estrueldu ensin xacíu, del infiernu del sinsentíu,
tornar de secute pal pacetible requexu onde vivo,
p’ aquel coín del mio país inda güei paraísu,
onde los folios en blanco o garabatiaos
enllenen ensembre ‘l mio paisaxe,
la mio vida, la mio mente, el mio corazón,
palabres míes o ayenes coles que viaxo
dica ‘l fin del universu.

Echando una güeyada

Una mesa y cuatro sielles arriendes de mio;
enriba la mesa un ceniceru y una carta bebíes;
una tele prendida, una telenovela que nun s’ oyi;
un cantar nuna minicadena, “A Dios le pido”;
tres homes y una muyer nunos tayuelos altos acoldaos na barra;
dos camareros con chaquetina colorada aceleraos del otru llau,
llimpiando, ún, un vasu, allugando servilleteros, l’ otru;
tres de mio una rapaza llei un periódicu, n’ otra mesa de cuatro sielles;
a la manzorga, un carricoche con un neñu, durmiendo,
mentanto, la ma, piernes cruciaes, avienta’l fumu abuxaracáu
qu’ estrái d’ un pitu amediáu rubiu qu’ aguanta,
doucemente, ente unos didos llargos d’ uñes moraes;
al altor de los mios güeyos, un floreru frayáu con delles hortensies
musties y avieyuscaes, obra de dalgún pintor que nin firma;
a la mandrecha, una naturaleza premuerta, un espeyu,
escariáu y pasáu de moda, mírame en tentes;
una máquina tragaperres, cantarina de xemes en cuando,
allampia porque dalgún veceru l’ acallente;
un armariu frigoríficu mediu llen o mediu valeru de xelaos
espera asosegáu pel branu ensin dicir nin res;
y una puerta, Cocina, convida a comer ensin fame,
demientres aguanta por un cartelu d’ Aseos con una flechuca
que t’ empobina a unos báteres que güelen a pinu.
D’ esmenu, un camareru de coloráu asitia delantre min,
ensin pidi-ylu, un platín de porzolana blancu cola cuenta;
allugo los cuartos nél, a la vera’l tique, ensin propina,
por apurar, por medranosu de que yo nun pagare;
doi ‘l caberu paparáu al café con lleche, yá cuasi esfrecíu;
llevántome seliquín y colo pa la cai ruidosa, adulces.
Dexo p’ atrás la cafetería, nun la miro nin de regüeyu.
¡Na ciudá hai tantes,

toes ensin alma!