Folganzán

¡Jolín! Cuásique un mes ensin manda-y un res a esti dichosu blog. Ún faise un folganzán como si ná. Yá, yá sé qu' ansí nun pue furrular un blog como ye debio; podía intentar iguar l' asuntu coles disculpes de tola vida: que si nun tuvi tiempu, que si hubo munchu trabayu y nun me dexaba nin alendar, que si había dalgún pilancu cola conexión a internet y nun pudi entrar nél, que si se m' esgonció l' ordenador, que si...¡yo qué sé! Disculpes, asgaya; pero de verdá, nenguna.

Soi un folgazan y yá ta. ¿Qué queréis que vos cuente? Pasóme 'l tiempo volando ente unes coses y otres: que si cole, que si clases, que si cuentes, que si viaxes, que si partíes al dominó, que si charres un migayu (voi ser sinceru: muncho más qu' un migayu) colos collacios a la cabera hora'l día, que si lleer pel llibru d' enriba la mesina de nueche (que m' enganchó un montón -a mi dame lo mesmo 'l qu' haya güei que'l qu' haya mañana: toos m' enganchen -), que si voi dexalo pa mañana que tengo más tiempu llibre,...Y mentanto, pasen tres selmanes.

Acabo llega a un puntu nel que la vocina de la mio tiesta, ésa que nun fai namás que tocar los tolanos a la xente, ta poniéndome a parir.

-"Lo que tienes ye que comprometete y dexate de tanta palabrería"

-"Pues bien, eso ta fecho - contésto-y yo - D' agora n' adelantre, y dígolo perserio, voi dedica-y más tiempu a esti cuadernu. Y prométolo bien prometio, como los políticos en vísperes d' ellecciones. ¡Yá ta! ¿Contenta?"

Pero la vocina nun me retruca un res.

¡Joder cola vocina, apaez namás pa criticar dellos de los mios actos, pero enxamás pa dame una palmadina nel llombu cuando faigo una promesa tan especial. ¡Nun hai quien la entienda! Voi acabar mandándola a tomar...

¡Hala,que-y den, y a siguir esfrutando d' estes fiestes! Pasáilo bien, y facéi tolos posibles por ser felices nestos díes, ensin escaecer que 'l mesmu llabor habéis facelu tolos díes del añu.