El pasáu xueves, día 3 d' Avientu, diose por fináu un cursu de Llingua Asturiana p' adultos, ési qu' añu tres añu tien siempres un bon númberu d' asistentes, pero que nesta ocasión superó enforma les espectatives: foron diecisiete persones les apuntaes y toes elles con un enfotu pergrande en conocer daqué so la so propia llingua y tamién saber un migayu de la situación pela que traviesa nestes dómines. o lo que ye lo mesmo, afondar nel puxu que la clase politica qu' hai n' Asturies ta poniendo p' acabar con ella. Y que nun nos vengan con fataes al rodiu de los importantes avances que dieron nos caberos años, porque toos, o cuásique, foron encaminaos a desaniciala dafechu. Inda nun foron pa ello, sicasí...
Y, a lo que diba, de too esto, del cursu recién acabáu, ¿ qué saqué en claro? Delles coses.
D' un llau, y xeneralizando, l' interés de la mocedá polo de so nun se pue camudar d' un día pa otru. Pero, con too y con ello, ye esa mesma mocedá la que sigue p' alantre, magar nun se fíe un res de los mandamases de turnu; la que tien el futuru nes sos manes, el de la llingua y el d' Asturies en xeneral; la que tien de tomar les riendes y esllarigar a toa esa vieya guardia de xente apoltronao que nun saben faer otra cosa que nun sía mirase l' embeligru y camentar nun futuru pa los xóvenes coles sos idees del pasáu.
Y d' otramiente, a nivel particular d' esti grupu, chocóme enforma 'l so altu grau de preparación que fixo que'l cursu fora una prestosada total pal qu' escribe estes lletres, que foi quien lu impartió.
Nun soi amigu d' acombayar, y tampoco nun lu soi d' afalagar ensin razón. Pero güei, sabiendo que pa esti añu les clases d' Asturianu p' Adultos finaron, toi echando en falta yá subir al colexu pa entamala a les seis y media la tarde.
Nun me peta finar ensin da-ys les gracies a toos ellos, y non poles hores qu' eché deprendiéndo-ys Asturianu, anque namás fora un plizcu, sinon polo bien que lo pasé viendo l' interés amosáu por toos y caún d' ellos.
Namás un deseyu: Que sepáis espardir na vuesa redolada tol ciñu 'l mundiu polo de nós.
Un abrazu y hasta la prósima espicha.
Y acabóse, pa otru día más.
No hay comentarios:
Publicar un comentario