Pues yá ta equí. Enantes de qu' ún se decate de nada, pasa'l tiempu volando y plántase el 2011 arriendes de nós col únicu envís de faenos otros 365 díes más vieyos. Tolo qu' asoceda a lo llargo d' él tráilu ensin cuidáu: ¿qué más-y da que la economía vaya pa meyor o pa peor; que la liga la gane el Madrid o'l Barça, que se caltenga'l Sporting o suba l' Uviéu; qu' haiga o non gobiernu nuevu; que sigan robando los de siempres o otros nuevos; que los bancos ganen mil millones, migayu arriba migayu abaxo, añu tres añu ensin que los ciudadanos vean un céntimu; que los grandes capitales s' escuendan en Suiza, nes Islles Caimán o nes SICAVs; que l' AVE nun aporte a Asturies o llegue a Ceuta y Melilla pasando per Andorra; que se prohiba fumar o non pero vendiendo tabaco; que se metan coles descargues gratis na rede o que la SGAE siga cobrando hasta por echar un cantarín nel chigre; que los políticos sigan engañándonos y contándonos, non mentires sinon falses promeses, como me dixo nuna ocasión un alcalde; que los xueces nun se pongan d' alcuerdu namás que pa dictar sentencies al gustu de caún; que los grandes delitos económicos d' unos pocos se pierdan nel tiempu y nes meses de dalgunos xulgaos pa que nun-ys pase ná a los responsables; que la xente siga votando o non a políticos corruptos o de llingua torticera; que la mesma sociedá que nos arrodia siga o non siendo d' un pasotismu pueril; que les distintes relixones sigan creyendo que caúna d' elles ye la verdadera y los sos representantes pontifiquen y quieran siguir fayéndonos comulgar con ruedes de molín; que la xente siga contando que los políticos gobiernen un país y non les grandes empreses multinacionales; que... ?
Y ansí tantes y tantes coses que nun hai papel que les aguante, por más montes que les papeleres baltien.
Pero 'l 2011 aporta tovía inxenuu; inda nun conoz como se les gaste esti mundu y el 2010 nun-y dixo un res; ye nuevín y tovía albidra ser pa camudar delles coses y faenos la vida meyor. Mui propiu de la neñez y la mocedá. Cuando vayamos allá per febreru dirá cayendo de la burra y entós dexarános siguir lo mesmo que tolos años nuevos que lu antecedieron: avieyando unos mesinos más y naguando porque apaeza 2012 pa esacecer esti mundu que nun sabe a onde va. Y el 2011 camudaráse nun ciudadanu más, d' esos del pasotismu pueril, al que nun-y va dar más ocho qu' ochenta. Total, pa lo que-y afecta a él.
Mentanto pa nós aportará otru Avientu y tornaremos a lo de Felices Fiestes y Prósperu Añu Entrante.
Pues qu' así sea, amén.
Hasta otru día, pásáilo lo meyor posible. Aprovechái la neñez del Añu, la so inxenuidá.
No hay comentarios:
Publicar un comentario