ESES S S S

Hai dellos díes escribía equí que la llegada de les turboglorietes a Grau diba ser tou un espectáculo: les primeres de la hestoria n’ España , ya la nuesa villa diba ser la primera en prebales, la pionera n’ instalales.Pues bien, dicía yo que les “turboeses”, si diben ser como les del parque, nun diba implantales naide. Cualisquier persona que viniera veles col envís de faer dalguna nel so pueblu o ciudá, diba salir espantáu.
Güei, de la que me paro pensar un migayu nello, nun dexo d’ almirame del nome de les dichoses retondes. Siempres camenté no del “turbu” como daqué tocante a coche: pon el turbu ya sal a …, mete’l turbu ya arranca que… entra-y el turbu ya entós… . Ye dicir, que lo del turbu sonábame a que’l coche alquiría más velocidá, corría más.
Y resulta qu’ a estes coses que tán faciendo en Grau llámen-ys turbo….¡Home , meyor llama-ys “ralentiglorietes”, porque estos cosos que ficieron, envede da-y fluidez a la circulación, lo que van faer ye atascala más entovía. Conque, si nun vos da más, voi siguir simplificándo-ys el nome a les “turboeses” ya dexalu n’ “eses”, que ye más cenciello ya más realista. De xuru que nun van escaecese de poner a la entrada ya salida del pueblu señales de tráficu d’eses de calzada sinuosa.¡Bah, oyi, pa que la xente polo menos sepa aú se va meter!
Dica n’ adelantre, ya mentanto nun se vea lo contrario, les dichoses "eses" que tán faciendo equí van danos más d’ un dolor de cabeza. Yá lo veréis. Al tiempu.

Bono, ya nun-y deis munches vueltes, que tamos en branu (¿?) ya nun hai que s’ encabronar.
Pasáilo bien ya a ser felices.
Hasta la prósima.