El Paséu' l ríu Martín.

Yá van delles selmanes que me pruye'l fechu de nun tener escrito daqué d' ello, hasta güei que m' alcordé otra vuelta del asuntu ya nun me quedó más remediu que faelo, si nun quería que l' escaezu se fixera dafechamente l' amu , como me vien pasando cada vez con más coses. Los años, ¡qué se-y va faer!

Resulta que hai yá enforma tiempu, de la qu' inaguraron el paséu que cuerre paralelu al ríu Martín hasta la so desembocadura, ocurrióseme comentar con una riestra xente, ente quien había dalguién enforma averáu al mandu municipal, que yera una vergoña que se fixera una obra ansí ensin pensar pa ná na llimpieza'l calce.

De xuru que yera too normal ya' l diseñu perfectu, viendo que tamos nun país onde nun se fai una obra pública bien de primeres. Siempre queda daqué que fai necesario una nueva inversión p' acabar de poner toles coses en riegla, Ya tovía..., espera tu, que pue nun ser la última.

Anque hai casos que son pa enclicase ya guardase embaxo la mesa pa nun salir ya que nun te vean. Entovía me vien a la cabeza la primer obra del Paséu'l Riú Cubia, acuantayá, coles sos filaes d' álamos qu' atosigaben colos sos vilanos a tolos alérxicos de Grau, y al cabu de dellos años, ¡a cambialo too! De xuru qu' había munches coses mal, porque féxose otru nuevu, hasta con llagunines per entrambos llaos, que tán seques cuasi tol añu.Vamos, qu' equí nun foi que se fixera una obra a medies, ye que se fixo mal de mano ya hubo que volver gastar otra vuelta parte de los nuesos dineros públicos. Pero, naide dixo ná. ¿Pa qué, si dempués too se sabe?

Pues bien. tornando al Martín, hai cosa de dos años, falando con ún de los mandamases d' anguaño nel ayuntamientu, ente otres coses, díxi-y tamién lo del ríu:

Que fixeron un paséu mucho guapu, ye verdá, pero...¿ daquién cavilgó nel modu de llimpiar el ríu? Hai que-y faer una o dos ramples nel sentíu nel que va l' agua, pa poder baxar la maquinaria afayaíza pa poder intervenir nel so calce: llimpieza de basoria, podar ya talar árboles que miedran como ellos solos, o arrincar toles males yerbes ya matos que crecen dientro ya que puen ser nalgún momentu un peligru, inda más si hai una llena que puea ataponar ya faer que pase l' agua perriba. O, fixáivos, namás qu' una rampla pa que, si-y cai a dalquién cualquier cosu dende enriba, tenga un llugar per onde baxar ya garralu.

Lo que nun se pue faer ye un páseu qu' encorseta dafechu al probe ríu ya llueu esperar p' acuriosalu que tengamos qu' entrar o pel ríu Cubia, al final, o per La Podada, enriba'l too.

¿Tanto cuesten una o dos ramples? Seique non.

Naguo porque se faigan, pero, por favor, que nun les diseñe'l mesmu de les "eses" que fixeron na carretera xeneral: Pensái no que sería tener qu' usar una rampla ya, pa llegar al ríu, tener que dir dar la vuelta pela Cabruñana.

Unn saludu ya hasta la siguiente. Pásenlo bien.