lunes, 19 de octubre de 2009

Pista "Polideportiva" del Colexu de La Cruz- Grau

Yá nin m' alcuerdo de los años pasaos nos que della xente de tolos colores ya toles ideoloxíes que taba metida nel Conseyu Escolar del C.P. Bernardo Gurdiel- La Cruz de Grau andaben naguando por una pista cubierta nel centru. Yera vergoñosu qu' ésti fora l' únicu centru educativu de la villa ensin nada asemeyao.
Alcuérdome d' hai más de venti años, de la qu' aporté a Grau, que m'atopé nun llugar onde los escolinos, si llovía, habían facer el recréu nun patiu cubiertu enllén de columnes (qu' entovía siguen) ensin nenguna proteición( ya ensin ella siguen). Inda nun sé como nun se mató nengunu, magar "chinchones" hubo ya hai abondos.
Pero lo que más me chocó de tol asuntu, n' entamando les piticiones de facer una pista cubierta, foi la desgana ya 'l " pasu de too" del equipu nel gobiernu municipal, del signu que vos pete, que siempres atopaba dalgún pilancu col qu' oxetar a ello. Foi un añu ya otru ya otru de pidir esta estructura pal colexu. Pel Conseyu Escolar pasaron persones de toa triba que s' alcontraron davezu cola negativa oficial, por unes razones o por otres, pa echar p' atrás la obra. De xuru, ya eso sí que ye verdá que lo creyíen, que cuntaben que'l colexu de La Cruz yera 'l de la élite de la villa. Pero la verdá ye que namás yera un colexu más, con escolinos como los demás, y non lo que cuntaben dellos cerebros inda sofitaos nos años caberos años de los sesenta, qu' entovía nun se decataran de lo que significaba la democracia (o más bien, como sabéis, la partíucracia). Siguíen inxertaos nuna forma de pensar pervieya, nuna forma de pensar que güei nun esiste. ¡Probes!
Nesti momentu, per aciu de daquién testón o non, pero con xacíu abondu pa ver les coses, los escolinos del colexu de La Cruz tienen una pista cubierta. Namái- y falta ser una pista polideportiva, ya pa ello hai que la dotar de tolo que-y fai falta: porteríes, canastes, vistuarios, etc. Porque inauguróse una pista pintada, colos sos fallos, que siempres los hai y tienen igua, pero agora hai que la completar. Si non, va ser namás una pista cubierta, por más que s' empeñen los políticos en llamala d' otra forma.
¡Hala, qu' hai qu' echase!
Mañana ye otru día ya entovía toca madrugar. Que lo pasen bien ya descansen meyor.

No hay comentarios:

Publicar un comentario