martes, 15 de marzo de 2011

Adoquinos

Nun soi p' aguantame más. Llevo tola vida caleyando a pie o en coche, pela cai que vei dende'l Parque d' Abaixo, pasa per delantre l' Ayuntamientu hasta l' antigu Maijeco, o dende'l Xulgáu hasta Las Cais Nuevas, o per delantre la Pescadería, espotricando siempres escontra los dichosos adoquinos que cubríen el suelu y naguando porque a daquién con mediu deu de sentíu común- y diera por iguar esti recuerdu de dómines pasaes. Camentaba que ya taba bien de que la ocurrencia que-y pasó pela cabeza hai dellos años a dalguién de declarar talos morrillos como un elementu hestóricu de la villa, se-y refugara d' una santa vez y apaeciera un políticu local o rexonal o d' aúquiera que fuese, que nun se dexara engatusar por talos razonamientos. Sicasí, tol mio gozu nun pozu. Otra vuelta a lo mesmo.¡Orixinales que son ellos, nin! Falando cola xente, cuéntente que' entovía s' alcuerden de cuando los allugaron neses cais, ansí que d' hestoria, ná de ná. ¡Chorraes de xente que nun tien nin un mínimu de sentíu común y fai un estropiciu coles perres de toos.¡Cómo se nota que tiren con pólvora ayena!
D' alcuerdu con ellos, inda nun m' esplico cúála ye la razón pa nun dexar les caleyes o los caminos de carru de los pueblos como taban, envede asfaltalos o hormigonalos, porque esos sí que tienen hestoria.
Pamidea que nun s' albidren les cosas. Les cais que se tán readoquinando son les d' entrada al centru de la villa, nun son peatonales. A lo meyor más p' alantre, pero nun ye una trabe pa poneles como ye debíu, como ye propiu del sieglu XXI. Porque han dexase de babayaes y escaecese de les mentes calenturientes de los que quieren ver neses piedres daqué más de lo que significaron: el remediu primeru pa nun andar naquellos tiempos ente barru y llamarga.
Pero eso ya pasó, agora los ciudadanos naguamos por caminar o circular peles cais a gusto. Amás, ¿cuánto tendríamos aforrao tanto en cuartos como en tiempu?
¿Y los adoquinos, qué faer? Pues que faigan una paré bien alta y bien llarga, hasta onde lleguen, nun sitiu céntricu, pa que los chavales faigan pintaes nella los fines de selmana envede faeles na Casa Cultura, nel Frontón, nes paredes de los Colexos o Institutos, nos Polideportivos, o aú cuadre que-ys dé por ello.
Toos saldríamos ganando.
Escribí " ganando". ¿Será por eso? ¿Emplegaría bien la palabruca? A lo meyor ta mal lo de "toos" y tendría de poner "algunos". ¿Y envede " saldríamos", poner saldrán"? ¡Bueno, agora ya ta!
Pásenlo bien y disfruten del día, que la primavera ta al caer.

No hay comentarios:

Publicar un comentario