XUNTOS DICA 'L FIN

¿Qué vos paez? Van busca-y los rebelgos al PP col envís d’aclarar la so corrupción nuna Comisión d’ Investigación del Parlamentu español. Jeje, Y entós, pónense a buscar un presidente pa ella y, ai, sorpresa, el PP y el PSOE algaman un alcuerdu pa nomar a un amigu d’ ellos, dexando de llau a Podemos y a Ciudadanos. Dáivos cuenta, esi presi, el tal Quevedo, ye’l que algamó acuerdos col PP p’ aprobar los presupuestos del estáu y llevar pa Canarias dellos cientos de millones d’ euros, al empar que vota les más de les veces col PSOE nel Congresu.

Y van investigar también los chanchullos y el rescate de delles entidaes bancaries qu’ armaron la de dios hai unos años, también n’ otra Comisión Parlamentaria. Y ¿a qué nun sabéis qué pasó? Que’ l PP y PSOE también alcordaron nomar a otra persona del so palu, otra canaria d’ otru partíu que sofita los mesmos presupuestos a cambio d’ otros cientos de millones pa la so tierra, dexando también de llau a Podemos y a Ciudadanos. La mesma persona, Oramas, qu’ aveza votar les más de les veces col PP nel Parlamentu.

Total, cuasi tres mil millones pa les Islles Afortunaes, inda más güei, amás de la presidencia de les comisiones. ¿Por qué será?

Yá lo vemos dir sabiendo cuando nos enteremos de cómo se van investigar los asuntos. Yá veréis cómo s’ allarga l’ asuntu nel tiempu y too queda en nada. Cuatro chorradines y a comer de los fondos estatales, que la vida son dos díes y amás ellos nun paguen nada.

¿Y PP y PSOE? A lo de siempre, a vivir a cuenta nuesa, bien apareyadinos como hasta agora.
 
Andái, siguíi bien, sorreís un migayu y a esfrutar del bon tiempu.