Tengo oyíu una bayura veces que n’entamando
agostu l’iviernu n’Asturies yá ta enriba. De xuru qu’acuantayá esti refrán se
cumplía satamente como se dicía ya se creía. Sicasí, d’ unos años p’acá, ta
quedando revieyu, pasáu de moda ya de tradición, yá nin el tiempu respeta a los
vieyos, los que, a lo llargo de cientos, de miles d’años estudiando’l cielu,
concretaron la so observación con dichos como esti ya otros munchos más.
Resulta que’l cambiu climáticu nun ye cosa d’estos caberos meses nin años. ¡Qué
va! Va yá un carráu de lustros que n’Asturies cayimos na cuenta de que los
iviernos nun son lo que yeran nin que los branos tampoco. Antes, el branu
duraba poco más d’ un mes, mentanto que’l fríu principiabla sinon a primeros d’
agostu, a mediaos. Les nueches enfrescaben ya teníamos que garrar la sábana, ya
hasta una mantuca si se terciaba, porque una hora enantes de riscar el cutu
dexábase notar. Al empar, estos calorones que güei vivimos tampoco los conocíamos
davezu per estes tierres. Home, né, un día o dos o tres, val; pero ansí, un mes
ya dos ya hasta tres si cuadra ensin ver llover a modo, ¿daquién s’ alcuerda de
dalgo asemeyao?
Pámeque vamos tener que dir avezándonos a
esti clima. Ya da-y gracies, porque si nos fixamos cómo tán los de la mitá
España p’abaxo, dan ganas de salir a carrenderes ya nun parar hasta Escandanavia
polo menos. Eso que perellí enriba tamién tán los glaciares diliénndose, que
nun sé que va ser d’esti planeta. Vamos acabar por escribir en papelinos los
nomes d’un montón de países, los que más nos presten, ya tiralos a la rebatina.
El que te toque, pues p’allá, no que puedas, nin. Qu’España, a esti pasu, acaba
camudando nun fornu que nin el Diañu va parar nél.
No hay comentarios:
Publicar un comentario