AQUELLOS BESOS...

Magar que s’ esgole ‘l mio suañu

de regalate un castiellu d’ oru

del que facete princesa encantada

a la mio vera,

yo, mal xuglar y peor bufón,

como a ti te petara, pero siempres

al to llau venerándote,

inda nun perdí la ilusión;

dacuando, inda suaño.

Sicasí, güei,

pa que nun se t’ escaeza

que nun t’ escaezo,

nestri intre deseyo pidite

que te quedes con aquel besu,

el que te di a la lluz de la lluna,

o con aquel xunto a la mar

o nel cumal de la montaña,

o l’ otru que gociamos un día cualquiera

nel que xuntos nos miramos

y vimos amor nos nuesos güeyos.

Y penriba too, aquel,

el primeru, nel que te dixi te quiero,

aquel col que los mios llabios

y el mio corazón

quedaron venceyaos perdafechu,

pa tola vida, a ti.

Porque camiento que val más

el besu más tienru,

dau siempres con llocura,

que ‘l más ricu castiellu,

fechu cola mayor dulzura,

seique.

Que l' amor enxamás afuxa del vuesu llau y que la sorrisa vos lu recuerde.