Yá
pasóu ‘l’ ecuador d’ esti mes de xuliu ya inda nun aprucióu ‘l branu por nengún l,lau.
-¡Jopeta, Tito, esti branu nun ía branu!-
diz dacuando la mia nieta.
Nun m’ estraña un res. Nu colexu
deprendiéron-y qu' esta estación yera la meyor del anu: la de nun tenere clase,
la de correre l.libremente por ahí, la de la playa, la de xugare conos amigos. Ya
en casa, dende bien pequenina, outru tantu de lo mesmo. Ya entovía, no que
llevamos d’ anu, nun gocióu d’ una selmana siguida pa podere dicire ou entrugare
tan siquiera si aquel.lo yera’l branu. Nun pisóu la playa a nun sere cuando foi
de vacaciones conos sous país. Polo menos esfrutóu de diez días de sol ya d’
enredos ente’l sable. Sicasí, nesti intre, el bon tiempu ía una quimera si
faemos casu a las previsiones meteorolóxicas. Da igual atendere pal parte ‘l
Tiempu d’ una cadena de Tv que d’ outra, d’ una emisora de radio que d’ outra,
d’ un periódicu ou d’ outru: Si nun orbaya, hai truena; si nun lo fai pol
entemeudía, failo pola tardiquina ya, si non, pola nueite; pero nun falla, eh.
Augua, no que yá l.levamos d’ esti anu, a fartucar. Quién sabe si despuéis, de
la qu’ aporte setiembre, ochobre ya demás nun vendrá una bona enteseca anque,
de momento, nin gota…de sol.
A lo meyor hai daquién que cuenta que tolo
qu’ escribí anantes ía porque toi fartu d’ augua. Ya ía mentira. A mí, lo del
sol, nun me petez un res. Con todo ya con el.lo, pa cualisquier cousa hai un
términu mediu. Ya anguanu ‘l tiempu tornóuse radical, ta como Puigdemont ya
compañía. Alcuérdome tovía del anu pasaú, que nos metimos n’ avientu con
restricciones d’ augua por toda España, conos pantanos valeiros ya polos que se
vía un filín de plata tresparente que dalgunos s’ emperraban en nomar ríu,
magar qu’ aquel.lo más bien s’ asumiaba a una mexada de gatu; avisos municipales
de cortes d’ augua puntuales; prohibiciones de faer más gastu del debío nos
l.lares de la xente; etc. Bono, pa xardines particulares de dalgunos, pa campos
de golf ou piscinas había abonda, pero esi ía outru tema.
Tol mundu naguando por augua, pidiéndola
polo alto ya polo baxo hasta al mesmu Nubeiru; ya eso que la seca valía n’
ocasiones pa xustificar dalguna falcatrúa política. Inda más, nun faltaron nin
tan siquiera procesiones con vírxenes ya santos, talo si vivíeramos hai un
sieglu, cuando las explicaciones ainda nun yeran abondo nidias ya la culpia echábase-y
a la xente, que padecía la seca pola mor de los sous pecaos. Valía entós todo p’
amenare a la xente ya métela na ilesia. ¡Ai, qué tiempos aquel.los! Güei, inda
quedan abondos resclavos d’ aquel.la costume, vezos que dalgunos s’ empeñan en
mantenere, magar naide-ys dea la razón. Sicasí, al.lá el.los cono suyo. Que cada
cual crea lo que-y pete ya sía feliz, pero ensin imponer nada a los demás. Ansí
sí se vive.
Pues bien, tanta seca, tanta seca, ya, por
hache ou por be, en xineiru entama a l.lovere. ¿Nun queríais augua? Pues
ambute. Ya, agora, en xuliu, nun abocanóu como mandan las témporas. Habrá que
tornare a pidire que yá ta bien polo alto ya polo baxo. Hasta sacar santos, si
fora menester. Pero… a vere si para, ho. Vei acabare por salinos aletas a
todos. Y a todas, que se m’ escaecéu eso del l.linguaxe inclusivu. Va matame la
vicepresidenta, si s’ entera.
Hala, siguíi esfrutando como
meyor podáis d’ esti branu que nun s’ enteróu que lo ía. Sicasí, una risina
puede echase: al mal tiempu, yá sabéis, bona cara.
No hay comentarios:
Publicar un comentario