POLA MAÑANA: PRIMER DÍA VACACIONES

      Gúei despertóu col miou nome nos l.labios, chamándome porque tenía ganas de meixar. Yeran las siete ya venti la mañana.

Dende’ l si.llón au m’ atoupaba l.liendo, salí escopetáu ascontra ‘l sou cuartu  p’ al.legrame las primeras horas del día col sou abrazu, el sou “tiiiito” ya ‘l beisu qu’ al.lugóu so la mia barba de cuatru días mentantu m’ eichaba los brazos al pescuezu. L.lueu, un “Tito, quiero faer pis, cuerre” fexo que me l.librara del sou apertón, magar qu’ ensin deixar de tocala, l.levándola de la manina hasta ‘l retrete. Espuéis, n’acabando faelu, enxagüéila con una esponxa, ensuguéila ya vistila a modu cona mesma roupa; darréu, empobinéi pal salón con el.la a recostinas col envís de sentala na sua siel.lina p’ almorzar; sicasí, a mediu camín, yá me dixo qu’ inda yera ceu pa el.lu, que quería primeiru ver los dibuxos animaos de Peppa Pig. Ensin problema, acomodéila nu sofá, ariméi la mesina a él ya dispunxe eil.lí los preseos d’ almorzar: una caxa galletas de chocolate, una taza enl.lena de l.leite fría, la serviyeta ya ‘l babeiru que-y amarréi al pescuezu pa nun s’ emporcar ’l pixama. Conque, ensin más, quitándose ’l pelu de los güeyos con un soplíu anantes de que you-y lu prindara con un l.lazu, agarróu una galleta chocolate ya emprencipióu a comer. Dalguna qu’ outra faraguya terminaba pol suelu ou porriba ‘l sofá. “Buf, vou tener que pañalas una por una, si non cómeme la mia fía”-camentéi-. El l.leite foi de dous paparaos ya ‘l paquete galletas nun-y duróu nin diez minutos. Ochu menos cuartu. ¡Ya esu que dicía que yera ceu! Entós, tiróuse p’ atrás, púnxose de l.lau pa enfrentar la tele ya nun santiamén zarróu los güeyos ya adormecéuse comu un anxelín.

A mi tocóume atropar las faraguyas del suelu ya del sofá p’ arroxalas al cubu la basoria.

Alcordéime de qu’ anueite, de la que fui buscala al colexu, veníamos xuntos pola acera camín del coche ya cuntábame que güei yá yeran vacaciones ya qu’ entós nun facía falta que la despertara a las ochu, que podía dormir hasta más tarde. Retruquéi-y you que diba deixala tar na cama hasta la hora que-y petara, que nun cuntaba faer ruíu nengunu por casa.

¡Sí, ho! ¡A las siete ya venti!

Quitéi la tele, baxéi la persiana ya, col salón cuásique a escuras, coléi pa la cocina a siguir l.liendo.

A las diez, sentíla buir nu sofá.

-¡Tiiito! ¿Tas ahí?

Que tengan un bon día y gocien de las vacaciones cona sorrisa siempres na cara.