domingo, 10 de mayo de 2015

COOFICIALIDÁ: LA SOLUCIÓN


Tuvi esperando a güei, en pasando yá la Selmana de Les LLetres Asturianes, pa escribir daqué al rodiu d’ esti pilancu nel que, añu tres añu, nos tienen metíos los nuesos políticos y que nun ye otru que l’ algame de la cooficialidá del Asturianu d’ una vez per toes. Acuantayá d’ ello; los que naguamos porque la nuesa llingua forme parte de los drechos de la xente que la quiera emplegar tamos fartos de glaya-ys al oyíu a los culpables de qu’ entovía caltengan esta situación; fartos de tener qu’ andar cuasi amatagaos pa que nun nos esfronar escontra la irracionalidá y cabezonería de dellos mandamases d’ esta tierra que nun dulden en facer bandera de les llingües n’otres comunidaes, mentanto qu’ a la d’ equí-y arremanguen palos hasta frayala perdafechu col únicu envís de proclamar llueu que yá lo dicíen ellos, que nun había nada que defender. O lo que ye lo mesmo: primero mátenla y llueu fain-y homenaxes.

Nestes elleiciones que nos vienen enriba, nun oyí a nengún partíu, a nun ser Izquierda Xunida, que nos sos programes tengan en cuenta la cooficialidá del Asturianu. Ya Izquierda Xunida, que siempres lo llevó, nun ye tampoco de munchu enfotu darréu que, cuando tuvo nel gobiernu compartíu col PSOE, escaeciólu aína, enxamás se-y ocurrió ponelu enriba la mesa a la hora negociar alcuerdos de poder, quedó nel caxón pa elleiciones venideres. Con too y con ello, polo menos alcuérdase d’ él. Los demás partíos, los cabezaleros, nin falar siquiera del asuntu.

De la mesma forma que defenden los drechos d’ una bayura de xente, llexislando pa ello, n’ otres situaciones de marxinalidá, n’ educación, en sanidá, en xusticia, en drechos sociales, etc, también podíen alcordase de les decenes de miles d’ asturianos que-ys piden a toes hores que nun dexen escaecíu nel mesmu caxón l’ Asturianu, que lu asoleyen cola dignidá que merez, pero non p' apaecer cuatro politiquinos un día de primeros de mayu nuna llectura, sinon pa da-y valir d’ una santa vez a esta llingua, y la solución pa ello pasa pola cooficialidá. Nun ye cuestión del gustu o’l noxu que-y produz a dalgunos, ye cuestión de drechos humanos y de defensa de la cultura d’ un pueblu qu’ inda, a pesar de los pesares y daqué espachurrada polos de siempres, sigui viva.

Pasen un bon domingu y nun escaecer la sorrisa.

No hay comentarios:

Publicar un comentario