¡Ai, ai, ai, que dalgunos tamos acolumbrándola!
La quinta fola, sí. Ta, seique, nesti intre enxendrándose non mui lloñe de la
nuesa costa y de la qu’aporte y esfrone escontra nós, anque seya daqué más pequeña,
va llevar per delantre a otra montonera xente: en forma de contaxos, d’ingresos
en planta, n’UCI o derechos pal
campusantu. Y nun digo un res de la economía, la diosa de la nuesa sociedá.
Magar nos cuenten qu'hai yá un quince por
ciento cola vacuna puesta completa y otru tantu por ciento mayor con una dosis,
la verdá ye qu’entovía la mayor parte la población ta ensin nada. Y los que
más, los xóvenes y yá non tan mozos, que ye pa que-yos cayera la cara vergoña a
una caterma pergrande d’ellos. Xustamente dellos grupos d'ellos son los que tienen
tantes ganes de folixa que tracamundien el final del estáu d’alarma col de la
pandemia. Y ansí nos va o nos va dir, veréis. Quiciás nun tracamundien nada, por desgracia, y
ye cosa namás de mastuerzos y faltosos. Habrá de too. Digo yo. Enguedéyense
colos conceutos y nun estremen ún de lo otro, nun son pa enterase que nun tien
nada que ver el tocín cola velocidá del gochu al salir del corripu. Pero a
ellos da-yos igual: siguiendo-yos la corriente a lo meyor a dellos politiquinos,
ye la so manera d’ entender la llibertá.
Y el personal sanitariu avisando del
peligru con pallabres perseries y xuicioses, pero que lleva l’aire o qu’entren
per un oyíu y salen pel otru. Encabronaos, encabronadísimos, hasta los santísimos
güevos han tar, inda más atalantando lo que-yos vuelve enriba llueu d'un añu llargu, llargu, afogaos pel so llabor.
¿Qué facer, entós? Pues les autoridades lo
de siempre dende l'aniciu la pandemia p’acó: pidir responsabilidá y xacíu a los
ciudadanos. Y con ello, alón, too iguao. Como si-yos ficieran casu. Los políticos,
demientres, llávense les manes y échense la culpia unos a otros pa que la xente
s’embelustre más y más hasta que naide seya p’atalantar qué ñarres asocede qu’enxamás
s’acaba cola dichosa covid.
Mentanto, en llugar de coyer al buei pelos
cuernos, porque la pandemia inda nun finó, unvíase la responsabilidá a los Tribunales de Xusticia pa que los
gobierninos de les comunidaes puedan recurrir lo que-yos pete de les midíes que
pescancien afayadices pa controlar la covid nos sos llugares. Como nun hai
lleis que los cubran, pues eso. El Gobiernu de los Xueces, una critarquía del
sieglu XXI n’ España
Dalgo asina como dicinos a los ciudadanos
que nel Congresu ná de ná afitanos na irresponsabilidá que güei se respira
ellí, qu’ esa cámara nun ye llugar pa facer discutinios sobre asuntos polos que nagüen los españoles, qu’
aquello ye namás un circu pa faltase unos a otros, ponese pingando y dexar a los
votantes ablucaos ente tanta “intelixencia”.
¡Qué-y vamos facer!
No hay comentarios:
Publicar un comentario