De la que me l.levantéi, bien ceu, como faigo davezu (ou eso camiento you, qu' ía alredor las siete la mañana), ariméime a la ventana la cocina pa vere un cachucu cielu ya sabere qué día faía.Nun taba mal, polo menos no qu' a mí me tocaba; l' azul que deixaban ver los cabeiros restos de nublina mañaniega abarruntaban bon tiempu.
Tardéi, comu cuasi tolos días, una media hora en tare na acera, a la veira'l portal, güeyando pa la mandrecha ya pa la manzorga, ya decatándome qu' había pouca xente tan arel.louriada comu you, que s' echara a la cai a las siete ya media d' un domingu de xineiru.
L' airín suave que me daba na cara apurría a las mias napias el frescor qu' unviaba la nieve qu' anubría ensembre tola contorna de la vil.la, ya a las mias ureas ya manos un fríu que cuásique las xelaba. Abrochéime l' anorak hasta 'l gargüelu ya echéi andare camín de La Podada, (antanu, barriu periféricu de Grau ,ya güei, cuatro casas vieyas pegadas a la carretera xeneral, arrodiadas de toda clas de construiciones nuevas, atravesadas por outras cais con outros nomes que desanicianon la barriada hasta deixala nesto, en cuatro casas) col envís d' aveirame ya echar una güeyada a mia mai, mira-y la tensión ya la diabetis, pone-y la insulina, echa-y las gotas nos güeyos ya al.luga-y na mesa la cocina las pastiel.las qu' había tomare anantes ya l.lueu d' almorzare.
En chegando a La Cruz, a mediu camín del recorríu, fixéime nos praos que s' acolumbraban p' arriba La Resquetina, blancos ya nidios talo si trapiara tola nueite, y nuna casina, nún de los coínos d' ún d' el.los, d' áu xurdía por una chiminea pequenuca una columna fumu drecha al cielu. Siguí caminando ya camentando nel.la porque truxérame a la memoria daqué que me cuntaran acuantayá. Nun séi muitu bien quién fora, peru sí que m' esplicara que cuandu viera que' l fumu d' una chiminea tiraba bien reutu p' arriba, yara señal de bon tiempu; acompangó esta especie d' afirmación con una riestra d' esplicaciones meteorolóxiques, de las que m' esqueicí darréu.
Agora, retorciendo las manos en bolsu pa que calecieran un migayu, cola cabeza encuída ya gacha metida pol anorak (pa evitare d' un l.lau que se me colara 'l fríu ya d' outru l.lau pa mirare pal suelu, nun fora pisare una mierda de perru de las que tantu abondan a estas horas de la mañana) pasada la parada l' autobús ya cerca yá de la sierra, nun deixaba pensare nu significáu de "bon tiempu" ya por más vueltas que-y daba nun yara p' atalantalo: si sol, si nubláu, si orbayu, si la tormenta. si la nieve, si la xelada,.... De la que cruciaba la ponte ' l ríu Martín, mentantu un rayín de sol s' esfronaba ascontra la mia frente, ya esperaba qu' un coche que venía de la cai La Flor, una d' esas nuevas pero non tanto, s' incorporara a la carretera xeneral, cheguéi a una conclusión: ¿Ya a mi qué más me da, si, como diz el refrán, nunca chueve a gustu de todos?
Al entrare na antoxana saquéi la l.lave del bolsu, abrí la puerta ya di-y los bonos días a mia mai.
No hay comentarios:
Publicar un comentario