SUPERTURBOGLORIETA

¡Coñó coles turboglorietes eses de Grau!
Yá l’ otru día me tocara, de la que diba pa Sandichi, pasar pela d’ El Parque y me paeciera daqué grande, vamos, una superturboglorieta.
Daquella entrugárame si lo que taben faciendo ellí yera pa da-y fluidez a la circulación o pa poner un parque infantil, del tipu del de la cai Asturias, nel mediu, pa que los rapacinos pudieran xugar a aldovinar, como cuando yéramos pequeños, a ver qué marca de coche diba ser el siguiente que pasara. ¡Y ye qu' estes zones son les meyores pa poner parques infantiles!
Y va güei y vuelvo dirixime pel mesmu sitiu.Pero entós, yá coles idees daqué clares y dalgunes nociones más nidies de lo que ye una cosa d’ éstes, fíxome na cadarma de la”turboesa” y camiento que el redondelón del mediu va durar bien poco.
“De xuru que nun ponen parque infantil”-albidro pa ente mi.
Y ye que baxando, diendo camín d’ Uviéu, un vehículu grande va pasales más que p… que Caín p’ arrodiala.
Torno pa Grau y entamamos a falar dellos conocíos mentantu “bareamos” un migayu con un par de vininos enantes de dir xintar.
Porque sí, o porque los temes de conversación nun van ser namás que’l fútbol, o por una casualidá d’ eses nes que nun creo, ún de los mios amigos diznos lo d’ un accidente qu’ ocurriera ayeri, seique.
“¿Y lo de la retonda d’ ahí abaxo? Un coche que nun vio o nun se decató de la retonda famosa y foise penriba d’ ella, vamos que tiró de frente."(¡Gracies que nun hai neños, Señor!- camenté pa mi.). Polo visto, el paisanu que conducía salió del coche fechu una fiera arrenegando de tolo qu’ había y faltando al respetu (ye decir, cagándose en tolo que se-y ponía per delantre) a cualquier autoridá que quisiera oyilu porque resulta que cuntaba a quien quisiera escuchalu, que nun había nin una señal qu’ avisara de la tan maraviosa y necesaria obra d’ El Parque.
¿Qué vos dicía? Otra qu’ entós tampoco nun ye casualidá, ye ineptitú, falta de sentíu común, barbaridá, o peor, pero eso yá lo definiréis vosotros meyor que yo.
“De xuru que diba como una bala, por eso nun s’ enteró”- terció otru de los de la tertulia. “Amás, nun escaecer que nun pue dir a más de cincuenta y, si fora asina, dába-y tiempu”.
“¡Non, d’ eso ná! Lo qu’ hai ye que facer les coses bien.”- retrucó ‘l que veno colo del accidente’l coche- “Ayeri mesmu pela mañana, de la que salí a dar la vuelta pel Paséu’l Ríu* pasé xusto cuando llegaba a la “turboesa” (como diz equí Alberdi), un tráiler. ¡Vaya ciriu, nin! Tuvo qu’ acabar por subise penriba los adoquinos que cierren la retonda y tuvo nun tris de marchar de llau y entornase dafechu. Féxo-y la caxa un movimientu raru, que por poco….”
“Y a mi yá me cuntaron, xente qu’ anda con autocares, que pa que puea pasar ún d’ estos, nun-ys queda más remediu que cuasi parar, maniobrar como nun se fai en nengún otru llugar , montar la retonda y meter el morru del autobús enriba l’ acera fixándose bien que nun pase un peatón per ella y lo lleven per delantre “- apuntó’l solteru’l grupu, que siempres anda d’ equí p’ allá y sabe más que Lepe
A mi, personalmente, estes coses que te cuenten nos chigres, que son el día día d’una villa y que puen tar más o menos retorcíes dependiendo de los adornos que-y pueda poner quien les cuente, dacuando paécenme más d’ un llibru d’ aventures de despropósitos y barbaridaes que d’ una obra de cuentu d’ un ayuntamientu.
Nun dexo d’ entrugame quién foi l’ inxenieru encargáu de diseñar la superturboglorieta d’ El Parque. Y quien lo sepa y, amás, –y encargara la obra, tenía que, polo menos, pidi-y cuentes, mandalu con vientu frecu y esplicar les coses a los moscones, que tienen la sensación de que con esa obra tan tirándose los cuartos.

Si ye verdá qu’ esti tipu d' obra ye pionera n’ España, entós, por favor, que vengan de tolos sitios del estáu, d’ Europa, de tol mundu, y que la vean pa qu’ aprendan y que nun se-ys ocurra facelo como en Grau.
Y pa güei, yá ta bien, que ye domingu y amás entra la primavera, cancien los paxarinos y ta bon día, nun llueve.
Hasta ‘l siguiente.