COMO TABA, TOI

¡Cómo ta’l patiu, mios nenos! Esto de les campañes ellectorales ye cosa de risa, o paézmelo a min polo menos. Toos dándo-ys una cuelma palos sonoros penriba y perbaxo a los rivales ensin que naide nos cuente propuestes nueves que nos faigan tan siquiera metenos en ganes de tornar a les urnes dientro d’ un par de selmanes. Magar que Podemos agora seya Unidos Podemos, por arte de maxa, pa lo que cuntó cola axuda de Garzón, nun me creo que vaya dar muncho de sí; y el PSOE de Sánchez anda un migayu al debalu, ensin saber muncho bien si sube o baxa; Ciudadanos y Rivera siguen a lo suyo, una de cal y otra d’ arena; y PP y Rajoy a la espera que llegue ’l 27 de xunu pa ver si alcuentren a daquién col qu’ axuntase. Si faemos caso a les encuestes, más o menos, toos van quedar paecío a hai seis meses, ansí que otra vuelta taremos coles mesmes torgues d’ entós y eses afamaes llinies roxes que toos defendíen a capa y espada. A ver cómo espliquen, si algamen dalgún tipu de pautu d’ invistidura o de gobiernu, la perda tiempu y de cuartos nos que nos metieron a los españoles.

 

Bono, sigo a lo de mio, pasalo bien y sorreír tolo que puedo, cosa esta que vos encamiento a toos vosotros.