UNA DÍA, UNA VIDA

Pente les fueyes doraes del la castañal,
como un esculibiertu que s’ esmuz
amedranáu de la mano del neñu,
afuxeron los mios güeyos,
anubríos dafechu poles llárimes
que se m’ escurríen, pasu ente pasu,
amugando adulces les mios mexelles
hasta desapaecer na mio boca,
que les sorbía arranada de los tos besos.
Y nel mio coral, naguando por vete,
miedra la señardá pola to ausencia.
Tantes hores desque la to solombra
nun s’ espeya na cama xunto a min,
tantos minutos ensin mirar la to piel,
d’ alabastru, que me dexa acolumbrar
el to amor más fondu.
Un día ensin ti, lloñe del to cuerpu,
una vida entera de tristura,
de melancolía,
d’ ensin vida.
Allampio yá
porque aporte l’ atapecida
p’ apertate ente los mios brazos,
date un besu
y oyír cada llatíu de los nuesos corazones,
acompasaos a les nueses miraes
enllenes del mesmu amor mozu,
llueu de cuarenta años
de regalu gota a gota
segundu tres segundu.

Que-ys presten estos díes de primavera adelantada y nun dexen la sorrisa en casa.