domingo, 25 de enero de 2015

SINTIENDO



¡Ai, qué me tarás cuntando!
Mírote ya escúchote;
sicasí, anque nun sía pa pescanciar un res,
de xuru que me fales a min.
A la to vera, apúrome,
ando escolforiáu,
nun tengo parada.
Voime pa casa desesperáu,
miétome n’ internet
a la gueta ‘l to llinguaxe ensin atopalu,
esprecétome tou
y torno pa contigo.
Vuelvo oyite, de la qu’ espiertes,
y consúmome
mentanto busco asemeyos
col mio pallabreru.
A la fin, asiéntome,
bien cerca de ti pa mírate a los güeyos,
y enfótome en que dientro pocos meses,
de la qu´entames a afarfullar,
entós podremos falar entrambos los dos.
Agora, con trenta díes,
seique non,
magar sienta no más fondo’l mio alma
que yá me conoces,
que ye’l to buelu,
que t’ anexa,
el que te fala.

Disfruten y sonrían.

 

No hay comentarios:

Publicar un comentario