lunes, 11 de enero de 2010

Bona idea

Hai ocho díes inda nun camentaba con seguranza que güei diba ser pa tornar a esti enriedu míu del blog asina, con un enfotu más grande nun mañana meyor.
Yá me decaté de lo que ye, anque ensin sabelo perdafechamente, acolumbrar per un furaquín la medrana énte la gafedá d' una malura inesperada. De magar m' enteré d' ello, hubo un periodu de tres o cuatro díes nos que dientro la mio cabeza namás s' emburriaben les idees más pelegrines tantiguando la mio fuerza nesi momentu ensin vergoña nenguna, cuásique hasta sentime esforciáu por dalgún d'esos camientos, y puxando por ser caún d' ellos el cabezaleru. Agora, qu' echo una güeyada p' atrás, alcuérdome d' esi tiempu; sicasí nun soi pa remembrar nin tan siquiera cómo lu pasé, qué fici, nin en qué pensé. Y non porque perdiera la memoria de sópitu, como pudiera pensase, sinon porque prefiero esborralos de la mio vida. Nun valen la pena. Por suerte, el ser humanu entovía ye p' alcordase de lo que quier y escaecer lo que-y pete o lo que-y interese.
Y a mi namás se me quedó grabada la idea que m' interesaba naquel y nesti momentu: una que m' ordenaba que siguiera echando la vista adelantre envede escondeme dientro mesmamente de mi; una que me contaba melguera que la vida ye pa esfrutala y non pa pasar per ella con xestu seriu, foscu y avinagráu; una que m' amuesó a la xente que me quería y non a la que m' arrodiaba; una que me glayó al oyíu que nun hai meyor futuru que'l del día a día y non el de les aloyes a años vista; una que me sutripó hasta escuaxiringame col envís de llevantame la cabeza; una que me metió nel corazón puxu abondu pa mirar p' hacia 'l 2010 con enfotu y esperanza; la mesma que nesti momentu me ta diciendo sele "¿qué te dicia yo?".
Prestóme aquella idea y quedéme con ella: Sonríi siempres a la vida, aprovéchala día a día.
Y ye verdá.
Yá sabéis: pintái una sorrisa mañanera enantes de salir de casa y esfrutái del día. Pasáilo bien.
Hasta la siguiente.

No hay comentarios:

Publicar un comentario