Viaxar

A min préstame muncho eso de viaxar. Lo que pasa ye qu' entovía nun fui p' atopar la manera de faelo a cuenta 'l paganini d' impuestos, ye dicir, a cuenta de xente como yo, pero ensin pagar yo. De xuru qu' hai que ser llistu asgaya pa faelo.

De la que me vienen estos camientos a la tiesta, lo primero que me da por sacar d' ellos ye que soi bien tolu, mira tu que nun alcontrar cómo se fai.

Pero dende ayeri toi acolumbrando la solución a esti problema. Lleí que 'l Principáu ta organizando un viaxe de placer a dellos países d' América, too a cuenta nuestra, ye dicir, de los que pagamos pero nun vamos, y nel que van participar polìticos (eso sí, los cabezaleros) y dellos empresarios, amás, camiento yo, d' otra xente, d' eso que s' apunta a un bombardéu si ye gratis. Y total, cuásique un millón d' euros. ¡Bah, nada! Baratu, amás, porque por eses perres, güei, nun se va nin a cenar a bocadiellos de mortadela.

Home, digo yo que será un viaxe de placer porque a llugares asina nun va ún dende Asturies por obligación, magar siempres hay dalguién que se esplaya cuntándonos les sos dotes de persona responsable. Yá sabemos toos que tienen razón; sonlo asgaya, hasta 'l puntu que puen convencenos hasta de que van llevar la comida de casa pa nun gastar un res de les arques públiques. Y yo diba creé-yslo, ¡faltaría más!

Y d' esti guacéu americanu, de xuro que van remanecer una bayura contratos de la hostia. Yá veréis. Van amuesanos semeyas de Tini y demás sentaos nuna mesa, o de paséu, o axuntándose cola emigración asturiana, con cara sorriente nel mediu d' otros de la so mesma triba allende los mares, firmando papelos. Llueu, dellos, de la que tornen p' Asturies, esnalen pela ventanina l' avión y caen na mar onde, d' esta mena, se tresforman en papelos moyaos.

Y los que-ys queden, será porque dalgún siempres queda trespapeláu nel maletu, ¿sabes?. Entós, l' empresariu que firmó 'l papel fai un negociu nel qu' afara abondo y tolos beneficios va repartilos con nós, colos que-y pagamos el viaxe. Porque esta xente que va nel avión va por faenos un favor a los asturianos y sacanos del pilancu nel que tamos metíos con tantu paru, emigración de la mocedá (anque esto ye una llienda, que dixo'l nuesu presidentín nun arranque de sinceridá), etc. ¿Qué cuntáis, que van pa sacar provechu pa ellos? ¡Nomenón!

Y agora que sé qu' hai esti tipu de viaxes, n' acabando esti artículu, voi poneme a escribir al nuesu presi pa que nel prósimu viaxe, anque seya a Oriente Mediu o a Siberia, que m' apunte, que voi dir yo a faer negocios tamién (tengo que poneme a discurrir sobre ellos) y voi regalar tolos beneficios a la Facienda'l Principáu pa paga-ys el sueldu a tolos asesores y xente asemeyao que lu aconseyen tan bien y fain posible que los asturianos, polo menos dalgunos, conozan un migayu del mundu, que nun va ser too dir hasta Los Oscos o hasta Ribadeva, o a Cabrales o a Degaña, que tamién esisten otros llugares como Madrid, Barcelona, etc; y tovía más, hai munchos, munchos más, y dalgunos otros sitios tán fuera d' España. Y los asturianos, con estos viaxes, amás de grandonos, vamos faenos internacionales.

Conque, ¡hala!, déxovos, que voi escribi-y, nun vaya ser que faigan la reserva pal viaxe por orden de llegada de les solicitúes y, por tar aquí dando la lata, quede ensin plaza.

Yá vos cuntaré. Mentanto, pasáilo bien y nun me tengáis tirria, que voi faelo pensando en toos vosotros.