ASTURIANU NA XUNTA

Y n’ Asturies fálase castellanu porque la señora Fernández lo dixo, y alón. Bono, también taben ehí, pa echa-y un sofitu, los de siempres, los progres del PSOE, más los nuevos de Cs. A IU tienen que cae-ys les pistoles colos sos collacios socialistes. Pensar qu’ ellos tuvieron tan dispuestos a echa-ys una mano pa que Javierín, l’ otru Fernández del tándem, fora Presidente del Principáu enfotaos nes sos promeses. Fixéronlo pergayoleros y echando la culpa de tolo malo que n’ Asturies asocediere a los demás partíos que nun comulgaron coles sos ruedes de molín. Presumieron hasta de que diban echar andar l’ Asturianu, que lo de so yera algamar que la Llei d’ Usu nun fora un papelu moyáu, como venía y vien siendo dica tiempu. Y agora resulta que ‘l Psoe va y, ensin que-y caiga la cara vergoña, diz-y que sí a Mercedinos pa que esta tuitee mui enchipada que llograron lo que dende acuantayá toos sabemos, que na Xunta hai un puñáu de persones, entamando polos sos cabezaleros, que dicen que trabayen ellí por Asturies, en castellanu, eso sí, que nun se-ys escaeza a los votantes, y cobren por eso, magar nun se-ys vea cómo desque s' anició la llexislatura, a nun ser nel repartu de cargos. Siguen defendendo l’ Asturianu non como daqué normal sinon como la Llingua de les caleyes (dacuando nin eso, pa ellos ha perdese nos museos o meyor desaniciala dafechu) y perhí, polo de falar o escribir n’ Asturianu nel so llugar de folganza o de trabayu, que caún piense lo que que-y pete, nun pasen, qu’ ellos y elles (¡qué chorrada!, pero ye como-ys presta dicilo anguañu a los políticos de fala percorreuta pa que la xente crea que piensen de verdá na cuestión de xéneros) velen por nós allugando trabes per tolos llaos al emplegu de la Llingua nuesa.

Cuanto más siento falar a estes persones d’ esti tema, inda más me reafirmo na mio defensa del Asturianu como cooficial p’ Asturies, Y, magar me dan ganes de facelo, apeteceríame atreveme a mandales pa dalgún llugar bien atacáu de basoria, puxarra y porcayaes onde se-ys atascaren los sentíos perdafechu (duldando si dexa-ys o non el sentíu común, porque pa poco-ys val), pero ye que nun consiguiría nada: fieden peor elles y llovería sobre moyao.
Y p' acabar, prestaríame saber el parecer del Conseyeru d'Educación y demás coses (¿o habrá que dicir Consejero pa nun molestar al tripartitu castellanista hasta fadiar?)

 

Un saludu candial y que la sorrisa nun se-ys esborre.