NUN ENTAMAR POLO DIFÍCIL, NEÑOS, QU' ENTÓS...

-¡Hala, pa que te chinches, al gallineru!

Cabreos, declaraciones, xestos d’ enfurruñamientu ya demás.

-¡Hala, que te pongo más cerca, anda!

Por fin, yera lo xusto, a ver qué se cuntaben esos.

En realidá, les conversaciones pa intentar llegar a un alcuerdu d’ investidura fain milagros.
-Yá nun van pal gallineru, a la vera nuesa- dicen agora los socialistes-, pa que se-ys vean les rastes ya la coleta cuando enfoquen les cámares de la tele.

¡Qué interesante, pero qué guapo ye esto de formar gobiernu! Van pa cuasi dos meses ya siguen con cosines como estes, la base de toa negociación, lo importante, vaya; llueu yá amarrarán los flecos caberos. 

-Si pautes con esi, comigo nun cuentes, eh-diz el de la corbata diaria.

.Ah, pues yo digo lo mesmo, pero al contrario- diz el de la paxarina cinematográfica.

-Ye qu’ hai enforma de puntos d’ alcuentru ente toos, ho, nun vos pongáis asina, yá veréis como too tien igua- diz el de la xaqueta ensin corbata. A mí, con que me dexéis de presi pa da-ys en focicu a dellos barones ya baroneses, toi cumplíu. Home, tamién tenéis que me dexar dalgún requexu ministerial pa unos cuantos, que nun van tar esfronándose contra too pa nun-ys dar dalgún puestín interesante, amás puen defendenos un migayu a toos. Andái, nun siáis malos, neninos.

-Yá, eso entiéndolo, pero ye que nós también tenemos dellos qu’ anden tres d'un sillón.

-Ah, sí, ya ente los míos asocede otru tantu de lo mesmo.

-Ná, eso tien igua, como lo otro. Hai sillones pa toos ya, si falta dalgún, ye cosa de sacalu d' onde sía, yá lu atoparemos ente los tres. Por eso que nun quede, eh.

-Oi, ¿ya con Rajoy qué faemos?

-Ná. Nin tocalu, hai que lu dexar tranquilu, nun ta l’ home pa munchos trotes. Eso de sacar de las crisis a munchos de los sos amigos del alma, aquellos que yeren el so meyor exemplu de gobiernu nes comunidaes, llograr que los aforradores nun perdieren lo de so dándo-ys los cuartos a los bancos, ya coses pol estilu, dexólu frayáu. Foron cuatro años mirando pa otru llau ya acabó con tortículis. Nun va poder dicir nin sí nin non, nin tan siquiera tolo contrario, va siguir como hasta agora, anque un pocu más encabronáu, pero eso pása-y, que nun hai mal que cien años dure. Conque dexáilu ya nun me lu atosiguéis, qu’ abondo tien pa él como pa siguir dándo-y la vara al probetayu -ya 'l de la corbata diaria punxo una carina musga'l probín que pa qué vos voi cuntar; notábase-y que lu taba pasando permal, pero España ye lo primero, como diría él.

-Bono, pues entós ná, vamos sentanos pa ver qué alcordamos- faló l’ensin corbata.

-¿Ya nun taríamos meyor de pies? Ye que tengo unes amorranes d’ agárrate. D’ hai dellos díes p’acá, sálenme a toes hores, lo mesmo cuando siento falar de Catalunya que del País Vascu, de Galicia o de La Rioja, hasta d’ Aragón y Cantabria; tán picándome a toes hores- retrucó ‘l de la paxarina cinematográfica.

-Ah, non, d’ eso ná. Lo meyor ye dar un paséu mentanto falamos de toles coses del futuru gobiernu. Relaxa muncho más- cuntó l’ encorbatáu de tolos díes.

¡Vaya, hom! Yá entamaron otra vuelta les diferencies irreconciliables ya otra vuelta s' armó la de Dios en casa Cristu: que si nun tenéis chapeta; que si eso que quies ye una llinia roxa;que si la de to ye azul ya prehí nun paso; que si tu namás quies que te vean pa que te faigan semeyes; que si l’ otru ye un folgazán por pidir tar sentáu; que si llíbrate primeru d’ esos picores periféricos; que si asina nun hai quien s’ entienda; etc, etc.

Total, qu’ otra vez a empezar.

Menudu filáu nel que tán metíos. Ya siguen ensin aclarase, nin los unos nin los otros. Ya too ye porque principien polos temes más abegosos. ¡Como si nun los hubiera más cenciellos pa dir abriendo camín, nin! ¡Ai, qué nenos ya que neñaes! Yá conocéis el refrán pol que se rixen: El que con neños s’acuesta, cagáu se llevanta.

 

¿Ya nós, qué? Pues eso, lo de siempre, a ver si lo podemos pasar lo meyor que nos dexen y echar una sorrisa anque sía ensin ganes.