PAISANÍN Y TIERRUCA

A ver si hai daqué de suerte y mañana domingu, cuarenta de mayu, podemos aventar el sayu pela ventana d’ una vez. ¡Que ya ta bien, refraneru! Como d’ esta nun aciertes, nun voi enfotame más en ti, que lo sepas. Magar que camiento qu’hasta’l refraneru ta esti añu fartu enforma d’ agua.

Esto del tiempu llévame a dellos conocíos qu’ escuché hai díes nos que falaben de que taben hasta les napies de semar fabes. Dalgunos yá lo ficieren tres veces. “Ye que nun salió niuna, nin”  “Nun me digas nada a min, que yá van tres veces que les semo. La cabera foi ayeri, pero como nun xorrezan, esti añu yá-ys pueden dar, que yo nun pongo otra”. El comentariu d’ ún y el retruque del collaciu lleváronme a camentar nos llabores d’ esta xente que se tiren hores y más hores abangaos p’ hacia la tierra o’l güertín de casa, hasta que la reñonada nun-ys dexa siguir, pa llueu engurriase viendo que nun hai ‘l frutu pol que naguaben. Pero inda más asocede con dellos comportamientos más que curiosos que me contaron estos díes. Y como me lo contaron, cuéntovoslo.

Resulta qu’hai un par d’ años un home que curiaba de la so cerezal como si fora oru puru por mor del ciñu que-ys tien a les cereces y a tanto como-y gusten estes picotes, pues garró una rede y anubrió l´árbol con ella pa que los páxaros nun-y acabaren con elles. Taba él tou gayasperu un día mirando pa la cerezal onde yá se vían apicalbar dalgunes d’ aquelles bolines tan prestoses, cuando pasa pel camín de fuera la finca una pareya de guardies del Seprona. Paren, entren nel prau, avérense al paisanu y entrúguen-y: “¿Oiga, ¡qué fai ese rede ehí?”.¡Coño, ninos, pa que nun me coman los páxaros les cereces, que nun hai añu que llibre una”. “Pues sentímoslo, pero tien que la quitar. Nun se pue tapar d’ esi modu un árbol frutal!” “¿Qué me dicís-y, ho?”. “Lo qu’ oi. Y por esta vez nun lu vamos multar, pero si tornamos prequí y sigue ansí, va cae-y una que yá verá. Los páxaros puen enredase nella y amás tamién tienen drechu a comer, paisanu.” Y con estes, garraron, marcharon y l’ home quedóuse tan plasmáu como yo cuando me lo cuntaron o más. “¡Joder colos páxaros, si quieren cereces que planten ellos la cerezal, nun te jode!”- refervió ‘l paisanu.

Conque, ensin dexar pasar un minutu más, foi a por una motosierra, entamó a arremanga-y bien pel tueru hasta que baltó la cerezal y llueu trocióla mentanto echaba cagatos al aire escontra too y escontra toos. ¡Ai, degorrios! A los dos o tres díes tornaron perellí los mesmos del Seprona. El paisanu ríase y camentaba. “¡Ala, que gúei vais jodevos! Nin rede nin cereces, si queréis que coman los páxaros, vais tener que compra-ys vós l’ alpiste”.

-“Hola, buenes tardes. ¿Qué pasó col árbol?”

-“Ná, que si nun diba comer una cereza, entós nin pa min ni pa ellos. A ver si cuntáis que toi esllombándome equí nesta finquina pa consiguís-ys la cebera a los bichos.”

Entós, mientres ún escribía, l’ otru díxo-y perseriu: “Tenemos que lu multar. Nun puede baltiar los árboles frutales, anque seyan suyos, cuando-y pete. Ansí, que…”

-¿Que qué, ho, que nun puedo qué?- el paisanu, perenritáu y con una fesoria na mano, nun sabía nin qué retrucar.

Nesi intre, l’ otru guardía acabara d’ escribir, arrincó la fueya del bloc

aquel y apurrió-yla.

-“¿Quier firmar equí, por favor?”

-“¿Que si quiero qué? Fuera d´equí agora mesmo, fuera d’ esta finca yá o matovos, fíos de puta, cabrones, que nun valís pa otra cosa namás que pa xingar a los probes que tenemos una güertuca…”

La cara mala hostía del paisanu y la fesoria llevantada nesi momentu cuasi a l’ altor de la cabeza nun aventuraba nada bono. Conque entrambos los dos tornaron pa xunta les motos.

-“¡La madre que lu parió! Danme ganes de mete-y un bon puru. ¿Oístelu? ¿Diste-y la multa?”

-Non, qué va, nin tiempu me dio ¡Anda, déxalu, que yá tien abondo cola cerezal. Imaxínate si-y lo fain a to pá nel pueblu, que tamíen tapa los arbeyos o les fabes de mayu”.

Montaron de secute y colaron ensin echar nin una güeyada p’atrás. Si lo ficieren, veríen al homín aquel sentáu en suelu colos güeyos clisaos llancaos nel suelu, mentanto-y corría una llárima pela mexella drecha y remungando: “Tola vida, más de setenta años, cuidando d’ esta tierruca, de los cuatro árboles que tengo, semando y plantando cuatro coses pa casa, pa que vengan estos putos políticos, qu’ enxamás vieron una tierra nin saben lo que ye una faba a nun ser en platu, a jodenos bien jodíos ¡La puta que los parió! Y estos guardies nun tienen culpia ninguna, pero… ¡¡¡Cagohastanaputa!!!”. Llevantóse, nun garró nin la fesoria tan siquiera, y empobinó pa casa.

Foi’l caberu día que’ aquel paisanu fizo casu de la tierra. Dexó de dir p’ allá. Güei ye una bardial nel que nun entren nin los ratos. Por más que-y lu quixeron arrendar dalgunos vecinos, l’ home simepres-ys retruca: “Que la trabaye l’ alministración y los políticos de turnu”.

Y ehí sigue.

 

Pásenlo bien, seyan felices y nun faigan munchu casu de les mios coses.