MICROCLIMES

Ta güei ’l día ente Pinto y Valdemoro, como dicen perhí. Tan pronto sal el sol, como delles ñubes faen los posibles por amatagar la so calor. Con todo y con ello, estes primeres xornaes de marzu tán faciéndonos escaecer daqué los meses pasaos de tanta agua. Anque paeza mentira, lo peor tán llevándoselo per otros llugares d’ España. Sicasí, a min chocóme esti día ver na tele como un determináu embalse pela provincia d’ Huesca, Lleida o Girona, nun sé, pero sí apegada a los Pirineos, taba a un nivel inferior al del que tenía l’ añu pasáu per estes feches. Acordies coles declaraciones de la periodista, paez ser que tán esperando a qu’ entame a dilise ‘l xelu de los montes pirenaicos pa qu’ algame una capacidá abonda pa pasar los meses que queden d’ equí a la final de la prósima seronda. ¡Pues mira tu qu’ echó agua pa esa fastera ‘l país! Nun sé si habría perellí una especie de microclima d’ esos nos que les condiciones meteorolóxiques son estremaes a les de too alredor. Como n’ Ibias, más o menos.

Aseméyase esto a lo d’ I. Xunida. N’ Asturies espotriquen escontra los imputaos d’ otros partíos, pero en cuantes.-ys toque a ellos, deféndense y atrinchérense n’ esplicaciones pueriles, escaeciendo dafechu les sos propies pallabres. O en Madrid, onde nun pagaben l’ IRPF que-ys descontaben a los sos trabayaores.¡Vaya exemplu pa la clase obrera que paga los sos impuestos relixosamente, oyi!
Pero, bono, a lo meyor lo d’ I.X. tamién ye un microclima. ¡Como nesti reinu xuancarlista hai tantos!

Pasen un bon día. Un saludu candial.